Стотици луѓе се спасени од траект што утрово се запали кај островот Крф додека патувал од Грција за Италија. Крајбрежната стража соопшти дека на траектот на италијанскиот превозник „Еврофери Олимпија“ имало 237 патници и 51 член на екипажот и најголем дел успеале да се качат во пловилата за спасување.

„Засега немаме информации дали има повредени и загинати“, кажаа властите.

Траектот испловил од Игуменица, најголемото пристаниште во западна Грција и одел за италијанскиот град Бриндизи, оддалечен околу девет часа. Причината за пожарот засега не е позната.

На снимката што ја објави грчкиот сајт „Прото тема“ се гледа 183 метри долгиот траект целосно во пламен.

„Нè разбудија околу 4:30 часот. Пожарот веројатно избувнал во гаражата на траектот“, изјави еден од спасените патници.

Во спасувачката операција се вклучени најмалку четири брода од двете држави.