Северна Кореја првпат ја покажа својата подморница на нуклеарен погон, која е во изградба, оружје кое би можело да претставува значајна безбедносна закана за Јужна Кореја и САД.
Државните медиуми објавија фотографии од она што беше опишано како „подморница на нуклеарен погон со стратегиски наведувани проектили“. Други детали за неа не се објавени.
„Се чини дека ова поморско пловило е од класа 6.000 тони или 7.000 тони, кое може да носи десет проектили. Терминот стратегиски наведувани проектили значи дека би можела да носи нуклеарно оружје. Таа апсолутно би била закана за Јужна Кореја и Америка“, изјави јужнокорејскиот експерт за подморници Мун Кеун-сик.
Портпаролот на американскиот Совет за национална безбедност Брајан Хјуз изјави дека се свесни за овие тврдења, но немаат дополнителни информации.
Подморница на нуклеарен погон долго време беше желба на севернокорејскиот лидер Ким Џонг Ун, кој првпат ја најави на голема политичка конференција во 2021.
Мун Кеун-сик смета дека Северна Кореја веројатно добила технолошка помош од Русија за изградба на подморницата, чии способности би можеле да бидат тестирани за една или две години. Северна Кореја веќе располага со 70 до 90 дизелски подморници, што е една од најголемите флоти на светот.
