Германскиот канцелар Олаф Шолц го обвини американскиот потпретседател Џеј-Ди Венс за мешање во претстојните избори во Германија откако тој се сретна со лидерката на крајната десница за време на посетата на Минхен.

Од кабинетот на Венс потврдија дека тој се сретнал со претседателката на Алтернатива за Германија (АфД) Алис Вајдел, девет дена пред изборите во Германија. Средбата уследи откако Венс ги нападна лидерите на ЕУ затоа што наметнуваат заштитен ѕид кон крајно десничарските групи.

„Германија нема да дозволи некој однадвор да се меша во нашата демократија, нашите избори и во демократското обликување мислење за Алтернатива за Германија“, кажа Шолц.

Анкетите ја ставаат АфД на второто место пред изборите на 23 февруари, на кои се очекува да освои 20% гласови. Сепак, сите партии ветија дека нема да коалицираат со неа.

„Поддршката за екстремно десничарската партија е спротивна на лекциите на нашата земја од своето нацистичко минато. Поддршката на администрацијата на Трамп за АфД не е соодветна и ние цврсто го отфрламе тоа“, кажа Шолц.

Венс вчера ги нападна политиките на естаблишментот, ја повика Европа да ја ограничи имиграцијата и ги спореди лидерите на ЕУ со советските комесари зашто ја критикуваат крајната десница и ја цензурираат слободата на говорот. Покрај тоа, кажа дека најголемата закана за Европа не доаѓа од Русија или Кина, туку одвнатре, од напуштањето на суштинските вредноси и начела.