Германскиот канцелар Олаф Шолц и неговиот веројатен наследник Фридрих Мерц ветија дека нема да соработуваат со крајната десница по парламентарните избори на 23 февруари.

„Никогаш, ама баш никогаш нема да имаме заедничка кауза со крајната десница“, кажа Шолц во парламентот, обвинувајќи го Мерц дека го прекршил зборот откако негови предлози за заострување на имиграцијата беа поддржани од Алтернатива за Германија (АфД).

АфД е втора во предизборните анкети, зад конзервативниот блок на Мерц, ЦДУ/ЦСУ, кој се очекува да освои најмногу гласови на претстојните предвремени избори. Според последната анкета на институтот ИНСА, ЦДУ/ЦСУ би освоил 30% гласови, а АфД 22%.

Сите партии ја отфрлија можноста за коалиција со крајната десница, со што формирањето влада по изборите би можело да се одолжи.

„Соработка со АфД не доаѓа предвид за нас“, порача Мерц денеска.

Тој ја обвини владејачката коалиција на Шолц за подемот на АфД, водејќи левичарски политики, спротивни на јасната волја на населението.