Три лица се во критична состојба по вчерашната бизарна несреќа на аеродромот во Торонто, кога се преврте авион при слетувањето. Во авионот на американската авиокомпанија „Делта ер лајнс“, кој летал од Минеаполис, имало 76 патници и четворица членови на екипажот, но никој не загинал и сите биле безбедно евакуирани.

Во болница се превезени 18 луѓе, од кои едно дете и двајца возрасни имаат сериозни повреди, велат итните служби.

„Многу сме благодарни што немаше загуба на животи“, изјави Дебора Флинт, портпаролка на аеродромот „Пирсон“ во Торонто.

Од аеродромот кажаа дека при слетувањето на авионот дувал ветер со брзина од 65 километри на час, а пистата била сува. Комуникацијата помеѓу пилотот и контролната кула била нормална и засега не е познато што тргнало толку драстично наопаку кога авионот ја допрел пистата.

„Слетувањето беше многу силно. Одеднаш, сѐ тргна настрана. Следното што знам е дека видов некакво трепкање, а јас се уште сум врзан, но седам наопаку“, изјави патникот Питер Карлсон.

Канадските власти одржаа две кратки прес-конференции, но не открија многу детали. Снимките споделени на социјалните мрежи покажуваат целосно превртен авион кој лежи на асфалтот покриен со снег. Се чини дека му недостасува барем едно крило.