Западна Европа денеска се подготвува за повеќе снег и мраз, а првата именувана бура во годината, Горети, го погоди атлантскиот брег на континентот. Повеќе летови беа откажани, железничките услуги беа прекинати, а патиштата блокирани додека бурата Горети се движеше низ регионот.
Силен снег го зафати парискиот регион кога се раздени денеска, додека јужниот дел на Велика Британија веројатно ќе биде најтешко погоден утре и задутре. Предупредувањата за студено време денеска опфатија огромни делови од Франција и Велика Британија. Француската метеоролошка агенција Метео Франс предупреди за снежни врнежи што се протегаат низ северната половина од земјата. Британската метеоролошка служба соопшти дека предупредувањата за мраз ќе останат во Шкотска, но ќе бидат укинати подоцна денеска во поголемиот дел од Англија и Велс. Автобуските услуги во Париз беа суспендирани додека продавниците се подготвуваа за првиот ден од новогодишните распродажби.
Пообилни снежни врнежи од вообичаеното за регионот неделава предизвикаа хаос во патувањето. Холандската авиокомпанија КЛМ откажа 600 летови закажани за денеска на аеродромот Схипхол во Амстердам, шести ден по ред прекин на еден од најпрометните центри во Европа.
КЛМ предупреди дека им снемува течност за одмрзнување на своите авиони и дека доцнењата во снабдувањето го отежнале обновувањето на залихите. Нејзиниот партнер „Ер франс“ изјави дека нема недостиг во Франција. Аеродромот Схипхол изјави дека сè уште има доволно залихи од различен вид течност за одмрзнување што ја користи за чистење на пистите.
Француските власти за цивилно воздухопловство побараа од авиокомпаниите да намалат 40% од летовите на главниот меѓународен аеродром во Париз „Роаси-Шарл де Гол“, и 25% од летовите од помалиот аеродром Орли. Во Брисел, некои летови беа откажани, а одмрзнувањето на пистите и крилата на авионите предизвикуваше доцнења.
Властите во Холандија им кажаа на луѓето да планираат да работат од дома ако е можно. Француските власти забранија камиони и училишни автобуси од патиштата во една третина од сите административни оддели, повеќето во северната половина од земјата. Извршниот директор на Карфур, Александар Бомпард, изјави дека забраната за камиони ќе донесе одредени нарушувања во синџирите на снабдување, особено во свежите производи.
