Володимир Зеленски ги предложи првите етапи од завршувањето на војната во Украина и кажа дека е подготвен да го потпише договорот за минерали со САД и да работи под силно водство на Доналд Трамп.

Иако призна дека неговата средба со Трамп не поминала како што треба, Зеленски нагласи дека е посветен кон мир.

„Никој од нас не сака бесконечна војна. Украина е спремна да седне на преговарачка маса што е можно побрзо. Никој не сака мир повеќе од Украинците. Јас и мојот тим сме спремни да работиме под силно водство на Доналд Трамп. Жалам поради нашата лута размена на зборови во Овалната соба. Време е да ги исправиме работите“, кажа Зеленски.

Тој се огласи откако Белата куќа денеска најави дека привремено ја запира целата американска воена помош за Украина.

„Првите етапи од завршувањето на војната треба да вклучат ослободување на воените заробеници и примирје на небо и море, односно забрана на бомбардирање на цивилната инфаструктура со проектили и дронови со долг дострел. Потоа би можеле брзо да преминеме на следните етапи и со помош на САД да постигнеме силен конечен договор“, кажа Зеленски.

Изразувајќи благодарност за досегашната американска поддршка, Зеленски кажа дека е спремен да го потпише договорот за минерали со САД. Тој во својата изјава не го спомна директно запирањето на американската воена помош.

Трамп и Џеј-Ди Венс жестоко го нападнаа Зеленски на нивната средба во Белата куќа во петокот, обвинувајќи го дека е неблагодарен и не покажува почит кон САД. Зеленски предвреме ја напушти Белата куќа без да го потпише договорот за минерали, по што Трамп му порача да се врати кога навистина ќе сака мир.