Српската влада лани во тајност основала заедничко вложување со компанијата за развој на недвижности на зетот на Доналд Трамп, Џеред Кушнер, за изградба на хотелско-станбен комплекс во Белград, при што Србија има рок до мај да ги сруши постојните згради на местото на денешниот генералштаб. Според протечените документи за инвестицискиот договор што ги објави независниот медиум „Радар“, фирмата на Кушнер „Атлантик инкјубејшн партнерс“ ќе има 77,5% акции во заедничкото вложување, а српската влада 22,5%.

Компанијата била формирана заради реконструкција на локацијата на генералштабот, кој беше бомбардиран од НАТО за време на воената интервенција во 1999 и оттогаш стои уништен и напуштен. Српскиот претседател Александар Вучиќ го поддржа скапиот проект, и покрај протестите и правните пречки.

Српската влада не ја оспори автентичноста на објавените документи. Иако договорот датира од февруари 2024, за него се дозна дури откако српскиот парламент минатата недела усвои специјален закон кој дозволува уривање на генералштабот заради „проект од важност на Република Србија“.

Според документите што ги објави „Радар“, во центарот на Белград за најмногу осум години треба да никне кула „Трамп“. Ќе се градат три кули со височина од 135 метри на површина од 280.000 квадратни метри. Србија се обврзала да ги урне постојните згради, да ја укине нивната културна заштита и да го расчисти теренот, давајќи го целото земјиште под 99-годишен закуп на Кушнер, со можност потоа да премине во целосно сопствеништво.

Освен неговото историско и симболичко значење, објектот имаше заштитен статус како единственото дело на модернистичкиот архитект Никола Добровиќ во Белград.