Двајца Британци и еден Мароканец кои беа заробени од руските сили во Украина се осудени на смрт, објави руската новинска агенција „РИА новости“. На Британците Ејден Ејлин (28) и Шон Пинер (48) и на мароканскиот државјанин Саудун Брахим им се судеше во судот на Народната Република Доњецк, кој не е меѓународно признат.

Тројцата беа обвинети дека се платеници откако беа заробени во Мариупол, иако семејствата на двајцата Британци тврдат дека тие пред четири години се преселиле во Украина и се бореле во редовите на регуларната украинска војска.

Ејлин и Пинер служеле во украинските вооружени сили и Велика Британија соопшти дека треба да се третираат како воени заробеници, со што имаат имунитет и не треба да им се суди.

„Шон ја сметаше Украина за своја втора татковина. Таму ја запозна и својата идна сопруга и беше посветен на хуманитарната работа. Неговиот тригодишен договор со војската требаше да истече на крајот на годината“, кажаа од неговото семејство.