На брегот на германскиот остров Боркум во Северното Море е откриено големо количество дрога, соопштија обвинителите. Во април, турист открил неколку сомнителни вреќи врзани со појас за спасување кои испливаа на плажата и ја известил полицијата. Јавното обвинителство во Аурих сега потврди дека во вреќите имало вкупно околу еден тон кокаин.

Тоа е едно од најголемите познати наоди на дрога на брегот на Северното Море на Долна Саксонија во последниве години. Сојузната канцеларија за криминалистичка полиција ја презеде истрагата, изјави портпаролката на јавното обвинителство во Аурих.

„Истражуваме во сите правци“, рече таа, без да даде дополнителни детали.

Од каде дошле пакетите, зошто завршиле на плажа и дали има осомничени во истрагата остана нејасно. Откривањето на вреќите веќе стана познато преку медиумските извештаи во април. Меѓутоа, истражните органи досега го оставаа отворено прашањето дали навистина во пакетите имало дрога.

Во последниве години, дрогата постојано се открива во вреќи исфрлени на источнофризискиот брег на Северното Море. Во 2021, на пример, работниците открија 25 килограми кокаин на брегот во областа Аурих. Слично количество дрога кусо пред тоа беше пронајдено на островот Балтрум. Пакети со кокаин исто така беа исфрлени на островските плажи на почетокот на 2017.