Претседателот на САД Доналд Трамп вчера ненадејно го разреши генералот на воздухопловните сили Си-Кју Браун Џуниор од функцијата претседателот на Здружениот Генералштаб, отфрлајќи борбен пилот и почитуван офицер како дел од кампањата предводена од неговиот секретар за одбрана Пит Хегсет за ослободување на војската од водачи кои ја поддржуваат различноста и правичната застапеност во своите редови. Смената на Браун, кој е вториот црнец генерал кој ја извршувал оваа функција, сигурно ќе го разбранува Пентагон. Во неговите 16 месеци на функцијата главниот ангажман беше со војната во Украина и проширениот конфликт на Блискиот Исток.

Смената на Браун, кој јавно го поддржуање движењето „Животите на црнците се важни“ (Black Lives Matter) откако полицаец го уби Џорџ Флојд, е најновиот пресврт во Пентагон, кој планира да укине 5.400 цивилни пробни работници почнувајќи од следната недела и да идентификува програми од 50 милијарди долари што би можеле да се скратат следната година за да ги пренасочат тие заштеди за финансирање приоритетите на Трамп.

Трамп рече дека го номинира пензионираниот генерал-полковник на воздухопловните сили Ден „Разин“ Кејн за следен претседател на Здружениот Генералштаб. Кејн е пилот од кариера на „ф-16“ кој служел на активна должност и во Националната гарда, а неодамна бил и помошник директор за воени работи во ЦИА, според неговата воена биографија.
Воената служба на Кејн вклучува борбени улоги во Ирак, места за специјални операции и позиции во некои од најкласифицираните програми за специјален пристап на Пентагон. Сепак, тој нема извршувано клучни задачи кои според законот се предуслови за функцијата, меѓу кои и да служи како заменик-претседател, борбен командант или началник на службата. Тоа барање би можело да се отфрли ако „претседателот утврди дека таквата акција е неопходна во националниот интерес“.

Секретарот за одбрана Пит Хегсет, во изјавата во која ги пофали и Кејн и Браун, објави отпуштање на двајца дополнителни високи офицери: началничката за поморски операции, адмиралката Лиза Франчети и заменик-началникот на Генералштабот на воздухопловните сили, генералот Џим Слајф. Франчети е втората највисока жена воен офицер што е отпуштена од администрацијата на Трамп. Трамп ја отпушти командантката на крајбрежната стража, адмиралката Линда Фаган, само еден ден откако положи заклетва за претседател.