Доналд Трамп го разреши советникот за национална безбедност, генералот Мекмастер, и на негово место го постави поранешниот амбасадор во Обединетите нации, Џон Болтон.

Трамп на Твитер му се заблагодари на Мекмастер и напиша дека „тој завршил неверојатна работа и секогаш ќе остане негов пријател“.

Болтон, кој ја застапуваше идејата да се нападнат и Северна Кореја и Иран, кажа дека неговото назначување ќе му даде на Трамп голем број опции. Тој е третиот советник за национална безбедност на Трамп во последните 14 месеци.

Мекмастер е последната голема промена во таборот на Трамп, кој минатата недела го отпушти и државниот секретар Рекс Тилерсон, заменувајќи го со шефот на ЦИА, Мајк Помпео.

Болтон ќе ја преземе функцијата на 9 април, бидејќи за негово именување не треба потврда од Сенатот.

Шеесет и деветгодишниот Болтон служеше во администрациите на Роналд Реган, Џорџ Буш и на неговиот син и е познат по својот порадикален пристап во надворешната политика. Тој помогна да се изгради случајот околу Садам Хусеин, што доведе до инвазија на Ирак, а се залага и за воена опција против Северна Кореја и Иран.