Доналд Трамп потпиша извршна наредба со која го означи фентанилот како оружје за масовно уништување, што ќе ѝ даде на владата дополнителна правна моќ во нејзината борба против нелегалната трговија со оваа синтетичка дрога.

„Ниедна бомба не го прави ова, од 200.000 до 300.000 луѓе умираат секоја година, колку што знаеме“, кажа Трамп.

Во извршната наредба се истакнуваат смртоносноста на дрогата и фактот дека транснационалните криминални групи, што администрацијата на Трамп ги означи како терористички организации, ја користат продажбата на фентанил за финансирање активности што ја поткопуваат националната безбедност на САД.

„Количината на дрога што влегува во САД по море е намалена за 94 проценти. Протокот на дрога е директна воена закана за САД“, кажа Трамп.

Администрацијата издвои значителни ресурси за борбата против фентанилот како дел од напорите за обезбедување на границата со Мексико, тврдејќи дека има пад на домашната потрошувачка на фентанил.

Синтетичката дрога, која има ограничена законска фармаколошка употреба, најчесто доаѓа во САД преку Мексико, каде што наркокартелите ја произведуваат користејќи хемикалии увезени од Кина. Производството на фентанил, исто така, е во подем во регионот „златен триаголник“ во Југоисточна Азија, кој ги вклучува Лаос, Мјанмар и Тајланд. Фентанилот лесно може да се направи и во импровизирани лаборатории.