Американскиот претседател Доналд Трамп им ги одзеде пристапот до доверливи информации на неговите поранешни поразени изборни ривали од Демократите, Камала Харис и Хилари Клинтон, како и на голем број други високи поранешни функционери.

Овој потег следи откако Трамп во февруари изјави дека ќе му ја одземе безбедносната дозвола на неговиот претходник Џо Бајден. Тој го потврди потегот во најновото соопштение, додавајќи дека го одзема пристапот до доверливи информации на „кој било друг член“ на семејството Бајден.

„Утврдив дека повеќе не е во национален интерес следниве лица да имаат пристап до класифицирани информации“, се вели во меморандумот на Трамп.

Поранешните американски претседатели и високи безбедносни функционери обично ја задржуваат својата безбедносна дозвола од учтивост.

Поранешниот државен секретар Ентони Блинкен и поранешните републикански пратеници Лиз Чејни и Адам Кинзингер, исто така, беа на списокот на оние кои ги загубија безбедносните дозволи, како и Фиона Хил, поранешна советничка за руски прашања во првата администрација на Трамп.

Трамп претходно им повлече безбедносни дозволи на повеќе од четириесет поранешни разузнавачки службеници, кои ги обвини за мешање во изборите во 2020 година во корист на Бајден.

Во 2021 година, Бајден, тогашниот претседател, му забрани на неговиот поразен ривал Трамп да има пристап до разузнавачки информации, наведувајќи го неговото „непредвидливо однесување“.