Доналд Трамп ја критикуваше Украина откако Володимир Зеленски кажа дека е изненаден што неговата земја не беше поканета на разговорите во Ријад, каде што вчера се сретнаа високи функционери на САД и Русија. Велејќи дека е разочаран од реакцијата на Украина, тој на некој начин ја обвини за почетокот на војната и додаде дека порано требала да направи договор.

Руска и американска делегација, предводени од првите дипломати Сергеј Лавров и Марко Рубио, вчера во Ријад се согласија да состават преговарачки тимови за да почнат разговори за крај на војната во Украина. Лавров притоа кажа дека Русија нема да прифати војски на НАТО да учествуваат во мировни сили во Украина.

„Слушнав дека Украинците се вознемирени што немаа свое место во Ријад. Тие имаа шанса три години и долго време пред тоа. Ова можеше да се реши многу лесно. Никогаш не сте требале да ја почнете војната. Можевте да направите договор. Јас можев да склучам договор за Украина. Со тоа ќе ја имавте целата држава, речиси целата држава, луѓето немаше да умрат, а градовите немаше да бидат уништени“, изјави Трамп.

По средбата во Ријад, Трамп кажа дека е многу посамоуверен.

„Разговорите беа добри. Русија сака да направи нешто. Сакаат да го запрат овој варваризам. Мислам дека имам моќ да ја запрам војната“, кажа тој.

Трамп вели дека ја прифаќа идејата за испраќање европски трупи во Украина.

„Ако сакаат да го направат тоа, тоа е одлично, јас ги поддржувам. Ние нема да мора да испратиме војска, зашто сме далеку“.

Британскиот премиер Кир Стармер претходно кажа дека секој мировен план за Украина ќе треба заштита од САД за да се одврати Русија од повторни напади врз својот сосед.

Државниот секретар на САД Марко Рубио кажа дека Украина не е тргната настрана и дека таа и Европска Унија ќе имаат свое место на преговарачката маса.