Белата куќа сѐ повеќе ја притиска Украина да го потпише договорот за ретки минерали како компензација за американската поддршка, велејќи дека одбивањето е неприфатливо. Доналд Трамп со овој договор бара пристап до украински природни резерви во вредност од 500 милијарди долари, вклучувајќи нафта и гас.

Сепак, додека САД и Русија почнуваат разговори за крај на тригодишната војна, силите на Владимир Путин преземаат сѐ поголема контрола врз украинските природни богатства. Руските сили се наоѓаат нешто повеќе од шест километри од наоѓалиштето на литиум Шевченко и напредуваат кон него од три правци, според украинскиот воен блогер „Дип Стејт“.

Украина располага со резерви од околу 500.000 тони литиум, додека Русија има двојно повеќе, според проценките на американската влада.

Шевченко се наоѓа во регионот Доњецк, еден од четирите кои Русија незаконски ги анектираше во 2022. Тоа е едно од најголемите наоѓалишта на литиум во Украина и лежи на длабочина што ќе овозможи комерцијално ископување.

„Имајќи го предвид сегашното темпо на борбите, Русите веројатно ќе стигнат до оваа област во следните недели. Заземањето на украинските резерви на минерали е една од стратешките цели на Русија“, изјави Конрад Музика, директорот на воената консултантска фирма „Рочан“ во Полска.

Руските сили напредуваат на истокот на Украина со месеци. Се проценува дека половина од украинските резерви на ретки минерали во овој дел од земјата сега е под контрола на Русија.

Володимир Зеленски еднаш одби да го потпише договорот за ретки минерали со САД зашто, како што кажа, не нуди никакви безбедносни гаранции. Тој вели дека Русија до детали знае каде се наоѓаат украинските наоѓалишта благодарение на геолошките истражувања од советско време.