Доналд Трамп денеска ќе потпише извршна наредба за укинување на министерството за образование, објави Белата куќа, што беше едно од неговите предизборни ветувања. Уште пред да биде потпишана, група демократски јавни обвинители поднесе тужба, во обид да го спречи Трамп да го укине министерството и да ги запре отпуштањата на половина од вработените.

„Ова е мрачен ден за милиони американски деца кои зависат од федералното финансирање за да имаат квалитетно образование“, објави една од водечките групи за граѓански права НААЦП.

Трамп и неговиот советник Илон Маск веќе затворија владини програми и установи без одобрение на Конгресот, но ова ќе биде првпат да укинат агенција која е дел од самата влада. Трамп не може да го затвори министерството без посебен закон, што може да се покаже тешко. Републиканците имаат мнозинство од 53-47 во Сенатот, но за закон за укинање на министерство требаат 60 гласови. Досега нема назнаки од демократите во Сенатот дека би поддржале ваков закон.

Трамп одамна најавуваше дека сака да го укине министерството за образование, нарекувајќи го голема измама.

„Контролата на федералната влада врз образованието ги изневери учениците, родителите и наставниците. Одделот потроши над три трилиони долари од своето формирање во 1979 година без да ги подобри постигнувањата на учениците“, кажа Белата куќа.