Доналд Трамп изјави дека оваа недела ќе објави воведување на реципрочни царини што ќе се однесуваат на сите држави, а не само на оние 10-15 со кои САД имаат најголема трговска нерамнотежа. Тој кажа дека царините ќе бидат објавени на 2 април, што го нарече „ден на ослободувањето“, кои доаѓаат по оние што веќе ги воведе за алуминиум, челик и автомобили.

„Ова ќе важи за сите држави“, рече Трамп.

Економскиот советник на Белата куќа Кевин Хасет претходно кажа дека царините ќе се фокусираат на 10-15 држави со кои САД имаат најголема трговска нерамнотежа, но не наведе кои се тие.

Трамп смета дека царините се начин на заштита на домашната економија од неправичната светска конкуренција и преговарачки адут за подобри услови за САД. Сепак, постои загриженост дека трговската војна би можела да ги вознемири пазарите и да доведе до рецесија во САД.

Во февруари, Трамп потпиша меморандум со кој им наложи на американските функционери од областа на трговијата да ги анализираат трговските односи со сите земји и да состават листа на приспособени контрамерки. Велика Британија, Европска Унија и Канада веќе најавија дека подготвуваат серија одмазднички трговски мерки.