Доналд Трамп се закани дека ќе ги нападне иранските мостови и електрани следната недела ако Техеран не се врати на разговорите, што следува откако двете земји разменија напади во изминатите четири дена.
Трамп претходно се откажа од заканата дека ќе воведе такса од 20% за целиот товарен превоз низ Ормускиот Теснец, но ја обнови блокадата на иранските пристаништа.

„Следната недела ќе стане навистина лошо за нив. Ќе ги срушиме сите нивни електрани и мостови, освен ако не седнат на маса и не преговараат. Ќе ги зачувам енергетските цели за крај, но на крајот ќе ги удриме и нив“, рече Трамп, повторувајќи ги заканите кои претходно беа осудени од меѓународната заедница.

Тој минатата недела кажа дека примирјето помеѓу САД и Иран е завршено по неколку напади врз бродови во Ормускиот Теснец, но им остави можност на преговарачите да продолжат да разговараат.

„Подобро да склучат договор или нема да им остане ништо“, додаде Трамп.

Тој во понеделникот објави дека САД се чувари на Ормускиот Теснец и дека воведува патарина за сите бродови што минуваат низ него, но од второто се откажа по само 24 часа.

„Одлучив да го заменам надоместокот од 20% за САД со трговски и инвестициски договори што разни земји од Заливот ќе ги склучуваат со Соединетите Американски Држави. Тие инвестиции ќе бидат масивни, но во исто време, извонредно добри за нив и за нивната иднина“, кажа Трамп, без да даде други детали.

САД ја укинаа двомесечната поморска блокада на иранските пристаништа во јуни како дел од меморандумот за разбирање, што требаше да биде почетна точка кон постигнување конечен договор за крај на војната. Сепак, Трамп на 10 јули го известил Конгресот дека ги обновува воените операции против Иран.

„Ако САД мислат дека со заострување на мерките против нас ќе се вратиме на преговори, тогаш прават грешка“, рече заменик-министерот за надворешни работи на Иран, Казем Гарибабади.