Неколку луѓе загинаа во мистериозни експлозии на два руски воени аеродрома.

Цистерна со гориво експлодирала на аеродромот близу градот Рјазан, 240 километри југоисточно од Москва, при што загинале тројца војници, а шестмина се повредени, објави „РИА новости“. Уште две лица биле повредени во експлозија во воздушната база Енгелс-2 во регионот Саратов.

Причината за експлозиите засега не е позната и тие се случија стотици километри од украинската граница. Во Енгелс-2 се стационирани стратешки бомбардери со долг дострел „Ту-95“ и „Ту-160“, какви што Русија користеше за ракетни напади на Украина.

Рускиот медиум „База“, кој има извори во безбедносните служби, објави дека Енгелс-2 бил нападнат со муниција со која била гаѓана аеродромската писта. „Астра“, уште еден руски независен медиум, објави дека се оштетени два бомбардера „Ту-95“.

Кремљ кажа дека Владимир Путин е информиран за инцидентите.