Турската полиција го уапси градоначалникот на Истанбул Екрем Имамоглу во рамките на истрагата за наводна корупција и поврзаност со тероризам. Покрај него, издаден е налог за апсење на уште 100 лица.

Властите затворија неколку патишта околу Истанбул и забранија демонстрации во градот четири дена, во обид да спречат евентуални протести. Во исто време, интернет набљудувачот „Нетблокс“ објави дека Турција го ограничила пристапот до повеќе дигитални платформи, како Икс, Јутјуб, Инстаграм и ТикТок.

„Ова е удар за волјата на нацијата“, вели Имамоглу во видео објавено денеска.

Негов соработник потврди дека 53-годишниот Имамоглу е приведен и се наоѓа во полициска станица.

Имамоглу важи за главен ривал на претседателот Ердоган. Опозициската Републиканска народна партија (ЦХП) планираше да одржи внатрепартиски избори на 23 март, на кои се очекуваше Имамоглу да биде избран за нејзин кандидат на претседателските избори. Тие треба да се одржат во 2028, но можно е да се случат и порано.

„Се соочуваме со голема тиранија, но сакам да ве уверам дека нема да бидам обесхрабрен. Владата сака да ја узурпира волјата на народот“, кажа Имамоглу во видео објавено на социјалните мрежи.

Претседателот на ЦХП, Озгур Озел, го опиша апсењето на Имамоглу како пуч.

Апсењето уследи ден по претресот во домот на Имамоглу, на кого ден порано му беше поништена дипломата од Универзитетот во Истанбул.