Кабинетот на претседателот на Казахстан соопшти дека околу 5.800 луѓе се приведени од полицијата за време на протестите кои изминатата недела прераснаа во насилство, а воената алијанса предводена од Русија испрати војници во земјата. Во немирите загинаа над 165 луѓе. Кабинетот Касим-Жомарт Токаев соопшти дека редот е стабилизиран во земјата и дека властите ја вратиле контролата врз административните згради кои беа окупирани од демонстрантите, од кои некои беа запалени.

Руската ТВ станица Мир-24 соопшти дека денеска се слушнале спорадични пукотници во Алма Ата, најголемиот град во земјата, но не е јасно дали тие биле предупредувачки истрели од органите на редот. Токаев во петокот рече дека ги овластил полицијата и војската да пукаат без предупредување, за да се воспостави ред. Аеродромот во Алма Ата, кој беше заземен од демонстрантите минатата недела, остана затворен, но се очекува утре да продолжи со работа.

Протестите поради наглото зголемување на цените на горивото започнаа во западниот дел на земјата на 2 јануари и се проширија низ целата земја, очигледно одразувајќи го незадоволството што многу поголемо само од цените на горивото. Истата партија владее со Казахстан од независноста од Советскиот Сојуз во 1991 година. Сите личности кои ќе ѝ се спротивстават на владата се или репресирани, изолирани или кооптирани, а финансиските проблеми се широко распространети и покрај огромните резерви на нафта, природен гас, ураниум и минерали.

Токаев тврди дека демонстрациите ги предизвикаа „терористи“ со странска поддршка, иако протестите не покажаа очигледни лидери или организација. Во соопштението од кабинетот се вели дека меѓу притворените има „значителен број странски државјани“, но нема детали.