Двајца мажи кои учествуваа во терористичкиот напад во бугарскиот град Бургас во 2012 година, кога загинаа шест луѓе, се осудени на доживотен затвор без право на помилување.

Специјален криминален суд во Софија утврди дека 39-годишниот Австралиец Мелијад Фара и 32-годишниот Канаѓанец Хасан Ел Хаџ Хасан, и двајцата со либанско потекло, биле соработници на бомбашот самоубиец Мохамад Хасан Ел-Хусаини, кој го изврши нападот на аеродромот во Бургас, кога беа убиени петмина израелски туристи и бугарски возач. На двајцата им се судеше во отсуство.

Во нападот беа повредени 35 луѓе и тоа беше најсмртоносниот напад врз израелски државјани во странство од 2004 година.

Според обвинителите, двајцата мажи пристигнале во Бугарија од Романија еден месец порано и ја напуштиле земјата вечерта после нападот. И бугарските и израелските власти за нападот го обвинија Хезболах.