Украинските дронови за првпат погодиле руска нафтена платформа во Каспиското Море, прекинувајќи го производството во постројката во сопственост на „Лукоил“, изјави функционер на Украинската безбедносна служба (СБУ).

Нападот врз платформата „Филановски“, која е дел од најголемото руско нафтено поле во каспискиот регион, е последниот знак дека Украина се обидува да ја засили својата кампања против руското производство на нафта и гас.

Најмалку четири дрона ја погодиле платформата, што довело до запирање на екстракцијата од повеќе од 20 бунари за нафта и гас, изјави функционерот на СБУ. Полето, кое беше откриено во 2005 година, беше пуштено во употреба од Владимир Путин во 2016 и произведува 120.000 барели на ден.

Не е познато од каде биле лансирани дроновите, бидејќи Каспиското Море е оддалечено 700 километри од најблиската украинска граница.

Украина изведе бројни напади врз руските нафтени постројки оваа година во обид да ја поткопа способноста на Кремљ да ја финансира војната, а од неодамна напаѓа и танкери од руската флота во сенка.