Украина вели дека соборила руски шпионски авион А-50, втор таков за нешто повеќе од еден месец. Авионот бил погоден на небото меѓу руските градови Ростов и Краснодар, според украински воени извори, околу 200 километри од линијата на фронтот.

Спасувачките служби наводно нашле остатоци од авионот во областа Каневској и гаселе пожар. Русија не ги коментира овие тврдења.

Шефот на украинските воздухопловни сили Микола Олешчук им се заблагодари на своите војници и на военото разузнавање за соборување на авионот, кој има радар со долг дострел.

На видеа споделени на социјалните мрежи се гледа како авионот е погоден во воздух. Властите во Краснодар потоа соопштија дека авион паднал во областа Каневској, без понатамошни детали.

Украина претходно на 14 јануари, исто така, се пофали дека соборила авион А-50.