Владата на САД им забрани на американскиот владин персонал во Кина, членовите на семејствата и на изведувачите со безбедносно одобрение да влегуваат во какви било романтични или сексуални односи со кинески државјани, објави „Асошиејтед прес“. Четири добро упатени лица кажаа дека оваа политика почнала да се спроведува од американскиот амбасадор Николас Барнс во јануари непосредно пред да ја напушти Кина.

Иако некои американски агенции веќе имаат строги правила за таквите односи, за ваква политика не се слушнало јавно од Студената војна. Не е невообичаено американски дипломати во други земји да бидат во врска со локални жители, па дури и да се венчаат со нив.

Поограничена верзија на оваа политика била донесена минатото лето и со неа било забрането американскиот персонал да влегува во „романтични и сексуални односи“ со кинески државјани кои работат како чувари или друг помошен персонал во американската амбасада и во петте конзулати во Кина. Но, во јануари, Барнс го проширил тоа на забрана за такви односи со сите кинески државјани во Кина, а сите кои ќе го прекршат ова, веднаш ќе мора да ја напуштат земјата.

До новата забрана во јануари, од американскиот персонал во Кина се барало да пријави каков било интимен контакт со кинеските граѓани кај нивните претпоставени, но сексуални или романтични врски не биле експлицитно забранети.