Ватикан ја затвори Систинската капела, каде што кардиналите ќе се соберат за да го изберат новиот папа, по смртта на папата Фрањо на 21 април. Фрањо беше погребан во саботата и продолжува деветдневен период на жалост пред да почне конклавата за избор на неговиот наследник.

На денешниот затворен состанок на кардиналите во Ватикан, беше одлучено конклавата да почне на 7 мај.

Клучен елемент од конклавата, древен процес што беше прикажан во ланскиот филм „Конклава“ со Реиф Фајнс, е инсталирање оџак каде што ќе се горат гласачките ливчиња по секој круг на гласање.

Посетителите кои влегоа во капелата вчера можат да се сметаат за среќни затоа што никој не може да каже колку ќе трае конклавата и колку долго Ватиканските музеи ќе бидат затворени за јавност. Според распоред утврден од црковните закони, конклавата може да почне дури по завршувањето на деветдневниот период на жалост.

Кога ќе почне, кардиналите ќе учествуваат во свечен и таинствен процес во кој, како што се вели, се водени од светиот дух, што ќе резултира со изборот на следниот водач на католичката црква. Изборот ќе одреди дали следниот папа ќе ги продолжи реформите на Фрањо, со неговиот фокус на сиромашните, маргинализираните и животната средина или тој ќе биде поблизок до конзервативните претходници, фокусирани на доктрината.

Капелата е именувана по папата Сикст Четврти, кој ја надгледувал изградбата на главната папска капела во 15. век. Папата Јулиј Втори ги нарачал делата на Микеланџело, кој го насликал таванот со сцени од Битие од 1508 и 1512 година, а подоцна го насликал и Последниот суд на еден од ѕидовите.