Градските власти на Вилнус претставија план за евакуација кој би бил активиран во случај на инвазија врз главниот град на Литванија. Според него, 540.000 жители би добиле наредба за заминување ако постои опасност градот да биде заземен од непријателски сили. Властите сметаат дека целиот град би можел да биде евакуиран за 48 часа.

Планот беше објавен среде зголемените стравувања од руските воени амбиции во регионот. Литванија, како и нејзините балтички соседи Летонија и Естонија, долго време предупредува на можна руска агресија и многу вложуваше во одбраната во последните години.

Вилнус е оддалечен само 30 километри од литванската граница со Белорусија, каде што се стационирани илјадници руски војници. Литванија исто така дели граница со силно вооружената руска енклава во Балтичкото Море, Калининград.

Планот за евакуација предвидува 150 рути за излегување од Вилнус и проширување на некои патишта и мостови заради побрз проток на луѓето. Жителите би добиле наредба за заминување преку СМС и сирени за тревога, а во изработка е и посебна апликација.

Градоначалникот Валдас Бенкунскас кажа дека евакуација би била последно средство ако не успее воената одбрана на градот и дека ова нема за цел да се шири паника.