Рускиот генерал Јарослав Москалик е убиен во експлозија на автомобил-бомба во градот Балашиха во московскиот регион, потврдија руските власти.

„Според првичните информации, во експлозијата загина генерал-полковникот Јарослав Москалик. Експлозијата веројатно била предизвикана од импровизирана направа наполнета со шрапнели“, изјави портпаролката на Рускиот истражен комитет.

Полицијата кажа дека отворила истрага за убиство и за шверц на експлозиви.

Државните медиуми објавија снимка од безбедносните камери, кои покажуваат моќна експлозија близу станбена зграда во моментите кога пешак поминува покрај возилото.

Педесет и деветгодишниот Москалик беше заменик-началник на Главната оперативна управа на вооружените сили на Русија, која е одговорна за планирање воени операции и за надгледување на борбената готовност.

Прорускиот телеграм канал „Меш“ објави дека автомобилот бил препродаден трипати од јануари, а последниот купувач бил 40-годишен жител на украинскиот град Суми.