Германската владејачка партија ЦДУ побара воведување законска минимална старосна граница од 14 години за користење на социјалните мрежи како ТикТок и Инстаграм. На партиската конференција во Штутгарт, делегатите усвоија предлог со кој се бара од сојузната влада, предводена од канцеларот Фридрих Мерц, подобро да ги заштити децата и тинејџерите во дигиталната сфера.

Партијата смета дека е неопходно да се признае посебната потреба за заштита на младите до 16-годишна возраст на интернет. Слични предлози претходно беа презентирани и од Социјалдемократската партија (СПД), која е коалициски партнер во власта. Иако во првичните нацрти се споменуваше граница од 16 години, ЦДУ сега инсистира на законски минимум од 14 години.

Во усвоениот документ се наведува дека државата не смее да остане неутрална додека децата се изложени на платформи дизајнирани за максимално привлекување на вниманието и влијание врз однесувањето. Конзервативците бараат национално и европско законодавство со кое платформите ќе се обврзат на строги системи за проверка на возраста, кои ќе бидат во согласност со заштитата на податоците.

Според предлогот, едноставното кликнување на поле за потврда на возраста повеќе не треба да биде доволно, а секое прекршување на овие правила треба да повлекува високи парични казни. ЦДУ се залага и за хармонизирани стандарди на ниво на Европската Унија за да се избегнат правни дупки во рамките на блокот.

Покрај законските ограничувања, партијата предвидува и зајакнување на дигиталното образование во училиштата. Планот е учениците да учат за начинот на кој функционираат алгоритмите и како да се заштитат од онлајн вознемирување и манипулации. Со ова, според ЦДУ, ќе се зголеми демократската отпорност против дезинформациите и радикализацијата.