Новата привремена премиерка на Непал, поранешната врховна судијка Сушила Карки, денеска го опиша ненадејното востание предводено од младите во земјата како „револуција што сè преврте наопаку“. Таа зборуваше додека ситуацијата во хималајската нација се смируваше по краткиот, но насилен бунт во кој загинаа најмалку 72 лица, а илјадници беа повредени.
„Се чувствувам крајно збунета“, им рече Карки на високите бирократи на воведниот состанок на кој присуствуваа медиумите. „Тоа никогаш не се случило во светот. Не знам за ниедна револуција што сè превртела наопаку за 27 часа“.
Таа рече дека владеењето сега се соочува со огромни предизвици, со уништени многу државни канцеларии и документи, и алудираше на можен заговор зад палењето на клучните институции, меѓу кои и канцеларијата на премиерот и Врховниот суд.
Официјално, бројот на жртви вклучува 59 демонстранти, 10 затвореници и тројца припадници на обезбедувањето. Најмалку 191 лице, меѓу кои 57 полицајци, остануваат хоспитализирани, а бројот на мртви може да се зголеми зашто безбедносните сили пронаоѓаат изгорени тела од локации како супермаркети кои беа запалени за време на немирите.
Бунтот избувна на 8 септември откако млади луѓе излегоа на улиците за да протестираат против корупцијата и забраната за социјалните медиуми наметната од владата. За неколку часа ескалираше во немири, бегства од затвори и напади со палење низ целата земја. Околу 13.000 затвореници избегаа додека толпите ги нападнаа центрите за притвор; 10 затвореници беа убиени во затворските немири.
Немирите го принудија премиерот КП Шарма Оли на 9 септември да поднесе оставка. По неколкудневни разговори меѓу претседателот Рам Чандра Паудел, лидерите на младинските протести и личностите од граѓанското општество, 73-годишната Карки беше назначена за привремена премиерка на 12 септември, станувајќи првата жена што на оваа функција.
Привремената влада на Карки вети дека ќе одржи избори до 5 март 2026 година. Денеска, им додели статус на „маченик“ на убиените демонстранти, вети обештетување на семејството на секоја жртва и нареди бесплатен третман за повредените.
