Александар Вучиќ изјави дека при посетата на Пекинг имал билатерални средби со повеќе од десет светски лидери, како и со кинески компании заинтересирани за вложување во Србија. Меѓу нив е компанијата „Кспенг“, која се занимава со развојот на летечки автомобили, најавувајќи дека тие ќе бидат претставени во Србија до 1 декември 2026, а ќе се користат на Експо 2027 во Белград.

„Јас му ветив на народот и сите ми се смееја кога зборував за тоа. Очекувам во Кина да добијат дозвола за летечки автомобили, кои сега чинат околу 300.000 долари. Верувам дека до 1 декември следната година ќе можеме да покажеме како функционираат летечки автомобили на територијата на Србија и дека тие ќе се користат на Експо во Белград, како што и ветив“, рече Вучиќ.

Тој додаде дека Кина бележи неверојатен напредок на сите полиња.

„Бевме на воената парада и можевме да видиме страотен напредок не само на кинеската војска, туку и на кинеските индустрија и технологија“, изјави Вучиќ, кој беше еден од ретките европски лидери на парадата.