Канцеларот Фридрих Мерц изјави дека Германија започнала доверливи разговори со Франција за европски нуклеарен штит, велејќи дека континентот мора да стане посилен за да ги обнови своите односи со САД.

Во говорот на отворањето на Минхенската безбедносна конференција, Мерц го повика Вашингтон да ја поправи и оживее довербата во опасната нова ера на политиката на големите сили, предупредувајќи дека САД не можат да одат сами додека стариот глобален поредок се распаѓа.

„Започнав доверливи разговори со францускиот претседател за европско нуклеарно одвраќање. Ние Германците се придржуваме до нашите законски обврски. Го гледаме ова како нешто вградено во нашето нуклеарно споделување во НАТО. И нема да дозволиме во Европа да се појават зони со различна безбедност“, рече Мерц.

На Германија моментално ѝ е забрането да развива нуклеарно оружје според меѓународните договори. Франција е единствената нуклеарна сила во Европската Унија и ја има четвртата по големина залиха на нуклеарно оружје во светот.

Мерц кажа дека раководството на САД повеќе не може да се зема здраво за готово и дека Европа мора да се подготви да заземе поцврст самостоен став.

„Лидерството на САД е доведено во прашање, можеби веќе е изгубено. Во ерата на големите сили, нашата слобода повеќе не е едноставно загарантирана. Таа е под закана. Меѓународниот поредок заснован на права и правила повеќе не постои на начинот на кој некогаш постоел“, рече Мерц.

Говорот на Мерц навести стратешко репозиционирање на Германија, која останува закотвена во НАТО, но се подготвува за иднина во која американските гаранции се помалку сигурни, а Европа мора да носи поголема одговорност.

Мерц, исто така, укажа на растечкото политичко и економско разделување со Вашингтон, како резултат на идеолошките и трговските спорови поврзани со политиките на Доналд Трамп.

„Се отвори длабок јаз меѓу Европа и САД. Културните војни на САД не се наши. И ние не веруваме во царини и протекционизам, туку во слободна трговија“, порача Мерц.