Доналд Трамп го продолжи својот вербален конфликт со Володимир Зеленски, велејќи дека тој не е доволно важен за да учествува во мировните разговори со Русија.

„Мислам дека тој не е доволно важен за да присуствува на средбите. Тој многу тешко склучува договори. Го гледав како преговара без адути во рацете. Тој нема никакви адути и ми се смачува од тоа“, кажа Трамп за „Фокс њуз“.

Ова доаѓа откако Трамп ја обвини Украина за почеток на војната со Русија и потоа го нарече Зеленски диктатор кој не сака да распише избори.

Трамп продолжи да го напаѓа Зеленски додека САД вршат притисок врз Украина да го потпише договорот за ретки минерали. Зеленски смета дека договорот не е сериозен зашто не вклучува никакви безбедносни гаранции за Украина. И покрај тоа, Белата куќа изрази уверување дека договорот наскоро ќе биде потпишан.

Трамп ги обвини францускиот претседател Макрон и британскиот премиер Стармер дека не сториле ништо за да се заврши војната во Украина.

„Макрон ми е пријател, а Стармер е добро момче, но не направија ништо за војната да заврши“, рече Трамп, притоа додавајќи дека имал многу добри разговори со Путин.