Франција ќе ѝ даде на Украина борбени авиони, противвоздушни системи и проектили, според договорот што денеска треба да го потпишат Володимир Зеленски и Емануел Макрон. Зеленски пристигна во Париз на разговори со Макрон, додека Русија ги засилува воздушните напади врз Украина и офанзивите на истокот и југот на земјата.

„Подготвен е историски договор со Франција. Ќе има значително зајакнување на нашите борбена авијација, противвоздушна одбрана и други одбранбени капацитети“, кажа Зеленски.

Веќе неколку недели се разговарало како Париз би можел да обезбеди повеќе воена поддршка за Украина, и покрај политичката и буџетската нестабилност во Франција. Макрон минатиот месец вети дека ќе даде повеќе борбени авиони „мираж“ од првично планираните шест и нова пратка проектили и противвоздушни системи. Според два добро упатени извора, Украина би можела да потпише десетгодишен договор за стратешка авијација со Франција, кој во иднина би вклучил и авиони „рафал“. Ова е дел од долгорочните напори на Украина да ја зголеми својата флота на 250 борбени авиони, вклучувајќи ги и американските „Ф-16“ и шведските „грипен“.

Франција, заедно со Велика Британија, инсистира на создавање коалиција од 30-ина земји кои би испратиле војници и средства во Украина или по нејзините западни граници откако ќе се постигне мировен договор со Русија, која се противи на ова.