Полицијата вечерва го блокираше булеварот Свети Климент Охридски во Скопје за да ги спречи демонстрантите да се движат кон Водно каде што е резиденцијата на претседателот на државата. По получасовно препирање со полицијата близина на седиштето на мисијата на ЕУ тие се разотидоа и протестот заврши.
Демонстрантите порачаа дека не ја прифаќаат идејата на Европската унија за обновени преговори меѓу лидерите на политичките партии. Тие велат дека ако Зоран Заев оди на преговорите во Виена не треба да смета на нивната поддршка. Бараат, ако веќе има нови преговори и тие да бидат вклучени во нив.
Протести вечерва имаше и во Битола, Велес, Штип, Струмица, Кочани, Прилеп и во Куманово. Во Битола, Велес и Кочани протестираше и невладината организација ГДОМ која ја поддржува Владата и бара избори на 5 јуни.
Од ВМРО-ДПМНЕ вчера потврдија дека ќе присуствуваат на состанокот во Виена во петок, но од СДСМ не одговараат на поканата на еврокомесарот Јоханес Хан бидејќи им треба време за консултации во рамките на коалицијата, но и со невладините организации кои се дел од движењето „Протестирам“.
Коментари