Алберт Удерцо, еден од креаторите на легендарниот стрип „Астерикс“, почина на 92 години.

Овој стрип првпат се појави во 1959 година во француско-белгиското списание „Пилот“ и Удерцо продолжи да го прави и по смртта на својот партнер Рене Госини во 1977. Стрипот, сега со нови сопственици, и натаму излегува.

„Удерцо почина во сон во својот дом во Нили откако имал срцев удар кој не е поврзан со коронавирусот“, објави неговото семејство.

По речиси 52 години работа на стрипот, Удерцо во 2011 го предаде на помлад уметник.

Удерцо и Госини се запознале во 1951 година, по што почнале заедно да цртаат, а ликот на Астерикс го создале откако им било понудено да направат списание кое ќе содржи „типичен француски херој“. Тие ја сместиле приказната во древна Галија и првиот број излегол на 29 октомври 1959. Стрипот во меѓувреме се продаде во 370 милиони примероци и според ликовите се снимени 11 филмови.