Последните три дена Центар за јавно здравје Скопје има земено 395 брисеви за тестови за коронавирус, а за месец август таа бројка е 4.675, велат од Центарот. Во претходните два месеца, јули и јуни, од страна на вработени во ЦЗЈ Скопје, земени се 7.629, односно 5.935 брисеви.

Брисевите што ги земаат вработените и епидемиолозите од ЦЗЈ Скопје главно се испраќаат на тестирање во Институтот за јавно здравје, МАНУ и на Инфективната клиника, а во мал обем се прават тестирања и во самиот центар. До пред една недела капацитетот за тестирање на ЦЗЈ Скопје беше 30, а сега имаат капацитет за околу 100 тестови дневно.

Освен земање брисеви на четири пункта во скопските поликлиники, вработените во ЦЗЈ Скопје постојано се на терен, бидејќи земаат и брисеви за контролни тестови во домовите на граѓаните кои се во изолација, во домовите за стари лица и во некои болници.