Платформата за родова еднаквост, заедно со организаторките на протестот за случајот Јавна соба и мрежа на здруженија кои што работат на унапредување на родова еднаквост побараа од министерот за внатрешни работи Оливер Спасовски до 8 март да испорача конкретни резултати за заштита на жртвите, на денешната прес-конференција одржана пред МВР.

„Од вас како министер очекуваме да ја реформирате полицијата во професионален сервис за граѓанките кој ќе овозможи ефикасна заштита на жртвите и прогон на сторителите. Исто така очекуваме и еден процес на чистење на полицијата од полициски службеници кои се сторители на насилство”, рече Бојана Јовановска, од Платформата за родова еднаквост.

Јовановска потенцираше дека непостапувањето на полицијата е доказ за бројните недоследности на работата на Министерството и пропустите во однос на обезбедување на заштита на жените од родово засновано насилство.

Платформата му даде ултиматум на МВР да иницира промени во Кривичниот законик и да поднесе пријави за злоупотреба на личните податоци, посредување во вршење проституција, загрозување на безбедноста и ширење на расистички и ксенофобичен материјал, согласно 8 март.

На предвидениот марш по повод Денот на жената тие ќе побараат отчет од министерот.

К. СЕЛАМОВСКА