По една година пауза, Скопје повторно ќе може да ужива во настанот „Филхармонијата во парк“, што традиционално се одржува на 26 јули. Настанот што градоначалникот Петре Шилегов го опиша како нешто најдобро што го организира Град Скопје оваа година е посветен на култната македонска рок група „Архангел“, чии хитови в понеделник (21 часот) ќе можат да се слушнат во едно ново руво, во нови аранжмани, подготвени од Џијан Емин.

„Кога ми беше предложено, со радост прифатив. Привилегија за рок музичар е да има еден ваков оркестар покрај себе. Јас не се сметам за музичар, туку за автор на песни и тие песни можете да ги облечете како за бал или во клошарска облека. Подготвувајќи се за настанот, открив една многу интересна работа. Кога ги пишував песните, не се гледав во нив, а сега, кога ги слушам во овој нов звучен амбиент, се најдов во нив“, изјави фронтменот на „Архангел“, Ристо Вртев.

Иако ќе диригира со оркестарот, Џијан Емин вели дека како фан на „Архангел“, ќе се чувствува и како дел од публиката.

„Неодамна заклучивме дека мојот прв настап со ‘Архангел‘ бил уште во 1998 како клавијатурист и оттогаш сме имале многу концерти заедно. Јас сум фан на ‘Архангел‘ и в понеделник, иако ќе бидам дел од изведбата, ќе се приклучам на публиката и ќе биде големо ужиување за мене. Некои песни ќе бидат малку изменети“, кажа Емин.

Тој го направил и изборот на песните што ќе бидат изведени, во што Вртев не му се мешал.

„Концертите на ‘Архангел‘ знаат да траат и три часа и да се свират речиси сите песни. Сега тоа не беше можно. Избрав песни што сметав дека се најсоодветни за изведба со симфониски оркестар“, откри Емин.

Г. КОНЕВ