Писателот Дејмон Галгат од Јужна Африка е годинашен добитник на престижната Букерова награда, за неговиот роман „Ветувањето“ (The Promise). Галгат по третпат беше номиниран за книжевната награда, по 2003 и 2010. Наградата во вредност од 50 илјади фунти ја доби на синоќешната свеченост.

„Ветувањето“ е негова деветта книга и е за падот на едно јужноафриканско семејство во текот на четири децении, од ерата на апартхејдот до денес.

„Романот е комбинација од извонредна приказна, богати теми и историјата на Јужна Африка од последните 40 години, во неверојатно добро обработен пакет. Има одлични идеи, тоа е книга со извонредно посветено внимание на структурата и книжевниот стил“, рече претседателката на жирито Маја Јасаноф.

Насловот на романот, „Ветувањето“ се однесува на ветувањето дека слугинката црнкиња од семејство белци ѝ припаѓа на куќата во која живее и земјата на која се наоѓа.

Лауретот рече дека е „навистина длабоко благодарен за наградата“.

„Помина долго време за да стигнам овде и сега кога стигнав, некако чувствувам дека не треба да бидам тука. Овде лесно можеше да се појави кој било друг од другите неверојатни, талентирани луѓе кои беа номинирани и неколку други кои не се тука“, рече 57-годишниот писател.