Српската православна црква денеска ја одобри афтокефалноста на Македонската православна црква – Охридска архиепископија, за време на заедничката литургија во Соборниот храм во Скопје на поглаварите на двете цркви, патријархот Порфириј и архиепископот Стефан. Патријархот Порфириј упати томос за афтокефалност на МПЦ-ОА до Вселенската патријаршија, која сега само формално треба да ја потврди афтокефалноста на МПЦ-ОА, откако на 9 мај веќе ја прогласи МПЦ-ОА за канонска црква.

„Благодарение на вашите молитви воспоставивме единство, а сега браќа и сестри ви носиме уште една радост – Светиот архиерејски собор на Српската православна црква едногласно во пресрет на барањето на Македонската православна црква – Охридска архиепископија, Соборот на нашата црква ја благословува и одобрува афтокефалноста на МПЦ-ОА“, кажа српскиот патријарх Порфириј, додавајќи дека остануваат да се разработат техничко-организациски детали, по што ќе следи свеченото прогласување на официјален акт.

„Потоа ќе бидат известени сите помесни православни цркви по својот канонски ред и тие да го прифатат афтокефалниот статус на МПЦ-ОА“, вели патријархот Порфириј.

Од возобновувањето во 1967 година, МПЦ-ОА беше меѓународно изолирана и непризнаена од православниот свет.