Украден авион кружи над северниот дел на Мисисипи и полицијата евакуираше супермаркет на „Волмарт“ откако пилотот се заканил дека ќе се урне во него.

Авионот почнал да кружи над Тапело во пет часот по локално време и четири часа подоцна сè уште бил во воздух, но се оддалечил од градот. Полицијата кажа дека директно разговарала со пилотот.

„На граѓаните им е кажано да ја избегнуваат областа. Имајќи ја предвид мобилноста на тој тип на авион, опасната зона е поголема од самиот Тапело“, соопшти полицијата.

Таа додаде дека авионот од типот „кинг ер“ го напуштил воздушниот простор на Тапело и сега лета близу фабриката на „Тојота“ во соседниот Блу Спрингс.

Снимките објавени на Твитер покажуваат авион кој кружи над домови и деловни објекти. Официјални лица кажаа дека киднаперот на авионот веројатно работи за фирма која изнајмува простор на аеродромот во Тапело.