Стивен Спилберг премиерно го прикажа долгоочекуваниот „Фабелманови“, испратен со громогласен аплауз на филмскиот фестивал во Торонто, најавтобиографскиот филм и еден за кој 75-годишниот режисер изјави дека го создавал целиот свој живот.
„Фабелманови“, кој Спилберг го напиша со Тони Кушнер, во голема мера црпи од детството на самиот режисер – од неговите родители, во филмот кои ги играат Мишел Вилијамс и Пол Дано, и од неговото рано формирање како режисер. Филмот започнува со плашливо младо момче пред кино кое оди да го гледа својот прв филм („Најголемото шоу на Земјата“). Мајка му го охрабрува: „Филмовите се соништа, кукле“.
„Очигледно е нешто за што размислував долго време“, рече Спилберг на сцената по проекцијата доцна синоќа. „Навистина не знаев кога ќе се осврнам на ова. Не затоа што решив да се повлечам и ова е мојата лебедова песна. Не верувајте во ништо од тоа.”
Спилберг рече дека првпат разговарал за тоа што ќе стане „Фабелманoви“ со Кушнер за време на снимањето на „Линколн“. Драматургот, рече Спилберг, ја играше улогата на терапевт додека Спилберг се растоварувал од спомените. Но, дури до пандемијата режисерот реши да ја раскаже, за првпат, сопствената приказна.
„Како што работите стануваа полоши и полоши, чувствував дека ако оставам нешто зад себе, што е она што навистина треба да го разрешам и отпакувам? рече Спилберг.
Спилберг, чии три сестри беа во публиката, додаде: „Овој филм за мене е начин да ги вратам мајка ми и тато. И, исто така, ги донесе моите сестри – Ени и Сју и Ненси – поблиску до мене отколку што некогаш мислев дека е можно. И за тоа вредеше да се направи филмот“.
„Фабелманови“ ќе игра в кино од 11 ноември во Њујорк и Лос Анџелес, а потоа и низ целата земја. Неговата светска премиера во Торонто – која беше веднаш по „Стаклен кромид: мистерија на извадени ножеви” на Ријан Џонсон – беше голем и необичен настан. Тоа беше првиот филм на Спилберг на фестивалот во Торонто, а при претставувањето тој рече дека првпат е во официјалната селекција.
Дваиполчасовниот филм веднаш беше примен како грандиозен и личен опус за Спилберг, и сигурно ќе биде голем кандидат за Оскарите. Освен Вилијамс, која е бремена со своето трето дете, и Дано, во актерската екипа се и Сет Роген како близок семеен пријател, кратка извонредна изведба на Џад Хирш, Џени Берлин и младиот Габриел ЛаБел кој го игра Семи Фабелман, измислениот млад Спилберг.
