Москва потврди дека украински дрон нападнал воена база длабоко на руската територија, при што загинале тројца војници. Противвоздушната одбрана го соборила дронот, но паднатите остатоци убиле тројца војници во базата Енгелс во јужна Русија, каде што се стационирани стратешки бомбардери.

Русија ја обвини Украина дека извела ваков напад и на 5 декември. Базата е оддалечена 500 километри од руско-украинската граница.

Руското министерство за одбрана соопшти дека дронот летал на мала височина кога бил соборен во раните утрински часови.

„Тројца војници починаа од повреди здобиени од паднатите остатоци“, додаде министерството.

Гувернерот на Саратов кажа дека немало закани по соседниот град Енгелс.

Русија наводно ја користи воздушната база Енгелс за да изведува ракетни напади на Украина. Кремљ и досега ја обвинуваше Украина за напади на руската територија, но нападите од овој месец се случија на голема оддалеченост од границата.