Осум луѓе се убиени, а повеќе од десет ранети кај Младеновац во второто масовно пукање во Србија во последните три дена. Повеќе од 600 специјалци и натаму трагаат по напаѓачот, кој е идентификуван како 20-годишниот Урош Б.

Тој прво пукал во селото Дубона, а потоа во селата Мало Орашје и Шепшин во околината на Младеновац. Министерот за внатрешни работи Братислав Гашиќ го опиша пукањето како терористички чин.

„Реонот во кој претпоставуваме дека се наоѓа убиецот е изолиран. На терен се сите единици на специјалната полиција“, соопшти српското МВР.

Мотивот засега не е познат, но српските медиуми објавија дека напаѓачот почнал да пука во луѓе од автоматско оружје по расправија со полицаец во Дубона. Потоа продолжил да пука од својот автомобил.

Новиот масакр во Србија се случи кога на сила стапи тридневна национална жалост поради завчерашното пукање во основно училиште во Белград, кога 13-годишник уби осум деца и еден чувар.