Дваесетгодишниот Урош Б., кој доцна синоќа уби најмалку осум луѓе кај Младеновац, е уапсен во селото Грошница близу Крагуевац, соопшти министерството за внатрешни работи.

„Полицијата продолжува да ги расветлува сите факти и околности на овој случај“, додаде МВР.

Само ден по пукањето во основно училиште во Белград, кога 13-годишник уби осум деца и еден чувар, поради што е прогласена тридневна национална жалост, во Србија се случи нов масакр. Напаѓачот прво пукал во селото Дубона, каде што убил полицаец и негова сестра, а потоа го продолжил својот поход во соседните села Мало Орашје и Шепшин. Жртвите на пукањето се на возраст од 15 до 25 години.

Ранети се 14 лица, од кои две се во критична состојба.

Мотивот на пукањето засега не е познат, а локалните мештани го опишаа убиецот како проблематичен. По него ноќеска трагаа повеќе од 600 полициски специјалци.