Во Црна Гора денеска се одржуваат предвремени парламентарни избори, со очекување дека ќе се надминат длабоките политички поделби и годините на нестабилност што ја попречуваа земјата на патот за влез во Европската унија. Околу 542.000 гласачи имаат право да избираат меѓу 15 партии и коалиции со кандидати, почнувајќи од групи кои се цврсто прозападни до оние кои се просрпски и проруски. За разлика од претходните избори, кога фокусната точка на кампањата беше дали земјата треба да се приклонува кон ЕУ или поблиску до Русија и Србија, економијата и животниот стандард овојпат доминираа во кампањите.

Изборите се први во Црна Гора во повеќе од 30 години на кои не се појавува Мило Ѓукановиќ, кој речиси постојано беше премиер или претседател на земјата од 2001 година. Тој загуби на претседателските избори во април.

Анкетите и аналитичарите предвидуваа дека Европа сега, новоформираното центристичко движење, најверојатно ќе добие најмногу гласови, но без доволно места во 81-члениот парламент за самостојно да формира нова влада. Демократската партија на социјалистите, партијата порано предводена од Ѓукановиќ, доживеа пад на популарноста по три децении доминација и има ново раководство кое бара шанса да се врати. Се кандидираа и кандидати од просрпскиот и прорускиот Демократски фронт, партија која се смета дека најверојатно ќе се појави како клучен фактор за формирањето на идната коалициска влада.

Ѓукановиќ ја предводеше Црна Гора до независност од Србија во 2006 година и ѝ пркосеше на Русија за да се приклучи на НАТО во 2017. Меѓутоа, новата владејачка алијанса набрзо стана нестаБилна, што го закочи патот на Црна Гора кон ЕУ и создаде политички ќорсокак. Владата падна со гласање недоверба минатата година, но остана на функцијата со месеци поради политичкиот застој.