Триесет и петгодишен Бугарин е уапсен во централното пристаниште во грчкиот град Кавала, по што во тамошниот окружен суд беше обвинет за навреда на националните симболи. Тој потоа беше ослободен, јавуваат грчките медиуми.

Според управата на пристаништето и очевидци, Бугаринот синоќа дошол на кејот на пристаништето „Апостолос Павлос“, при што го симнал и фрлил грчкото знаме и го закачил знамето на Бугарија.

Откако очевидци ги известиле пристанишните власти за ова, тие се обиделе да го уапсат 35-годишниот маж кој давал отпор, го навредувал обезбедувањето и викал дека овие области ѝ припаѓаат на Бугарија. Против него е поднесен предмет во основното обвинителство на Кавала.

Според информациите, ова не е прв ваков инцидент на уапсениот Бугарин, за кого се вели дека е член на екстремистичка организација која се залага Кавала и регионите на источна Македонија да бидат дел на Бугарија, а не на Грција.