Организацијата на изборот за убавина Мис Универзум (МУО) ги прекина врските со партнерот од Индонезија, откако неколку натпреварувачки обвинија за сексуална злоупотреба, на неколку дена пред одржувањето на крунисувањето на Мис Универзум од Индонезија, во Џакарта. Натпреварувачките рекоа дека од финалистките неочекувано било побарано да се соблечат за „проверка на телото за лузни и целулит“, а некои рекоа дека биле фотографирани топлес. Полицијата во Џакарта ги истражува тврдењата.

МУО исто така соопшти дека го откажува овогодинешниот натпревар во Малезија, кој го води истата компанија, ПТ Капела Свастика Карја.

Организацијата Мис Универзум им се заблагодари на жените кои поднеле жалби за нивната храброст и повтори дека „обезбедувањето безбедно место за жените“ е нивен приоритет.

„Со оглед на она што го дознавме дека се случило на Мис Универзум од Индонезија, јасно е дека оваа франшиза не ги оправда нашите стандарди, етика или очекувања на брендот“, објави синоќа МУО, чие седиште е во САД.

Мис Универзум е популарен настан во Југоисточна Азија, особено во Индонезија, Филипини и Тајланд, каде што победничките стануваат познати личности и влијателни на социјалните мрежи. Попи Капела, директорката на франшизата за Индонезија, рече дека „Никогаш не познавала, наредила, барала или дозволила некој што играл улога и учествувал во процесот на организирање на Мис Универзум Индонезија 2023 година да изврши насилство или сексуално вознемирување преку проверка на телото“. Таа исто така додаде дека е против „секаква форма на насилство или сексуално вознемирување“.

Индонезијката Фабиен Никол Гроневелд, која победи на натпреварот за претставување на својата земја, ќе се натпреварува во финалето на Мис Универзум во ноември 2023 година, со поддршка на организацијата.